Chega a cuarta entrega do ESC na que incluímos nesta lista de camariñáns senlleiros a un patrón e armador que está ao fronte da súa propia embarcación pesqueira. No medio das novas sobre a colocación ou non de cámaras dentro dos barcos, o control mediante os diarios dixitais e unhas cotas a baixa parecera que o peixe pasou case a un segundo plano dentro da actividade pesqueira. Por sorte o novo integrante do Eu Son Camariñas fala con nos para volver a situala no centro da cuestión e para reivindicar os esforzos que están a facer os traballadores do mar por manter a dignidade da súa profesión.
Evaristo Antelo López estudou Mariña Civil «Sección Puente» na UDC. Tras rematar a licenciatura enrolouse na mariña mercante na cal traballaría durante anos antes de volver a súa vila natal, Camariñas. Aquí faise cargo da súa propia embarcación cos cargos de patrón e armador. Máis de 10 anos de experiencia dende a ponte de mando aválano como unha das voces máis respectadas da zona a hora de falar da pesca e por iso, hoxe, conversa con nos a cerca do presente desta profesión e sobre como afrontar o seu futuro.
